Cras su Síndigu atóbiat sa genti de bidda, deu no ddu andu ca tèngiu cosa de atendi e po cussu scriu innoi is chistionis chi ndi ia ap’ai bogau chi ddoi fiu pótziu andai.
- Sa bidda ndi pigat su nomini de sa ‘via maxima’ duncas iat a essi pretzisu a nomenai cun ‘via maxima’ un’arruga de bidda, s’arruga chi fut sa ‘via maxima’ est sa ‘via Casalini’, a custu Casalini innoi non ddu connoscit nemus e non scideus mancu su nomini ma su sangunau sceti. Sa ‘via maxima’ passat de ingunis ca prus a innantis du est un’àtera bidda chi ndi pigat su nomini de ‘Sa ia majore’ ca fut su nomini de sa ‘via maxima’ in su tempus de is Giugis.
- Teneus una cresiedda disconnota, sa cresia de Santu Nigola, est numenada in archíviu diocesanu e parrochiale, parit chi siat de su cumintzu de su mediuevu, fut pagu fora de bidda fintzas a su 1982, imoi est apalas de ‘via ogliastra’ incassillada intra una filera de terras po domus e sa S.S. 292. Sa cresiedda est strantargia mancai chena de cobertura ma chi non si fait calincuna cosa luegus megat de ndi arrui, no esistit mancu unu stúdiu académicu asusu de custa cresia e is académicus si creint ca sa cresia de Santu Nigola siat s’Oratóriu de is animas (Ndi fueddu innoi). Tocat a fai calincuna cosa po da salvai e po dda fàiri studiai.
- Custa bidda non tenit, me is paperis, unu centru stóricu e duncas no ndi podit pigai su dinai de is bandus de sa RAS, iat a tocai a modificai su PUC.
- Sa risorsa prus manna e prus bella chi teneus est sa terra. Terra bella a traballai, scideus comenti in dii de oi funt de importu is produtzionis a km 0, non si podit cumprendi comenti est ca de totu sa terra bella chi teneus ndi traballaus pagu e pagu cosa bendeus, ita podit fai sa política?
Saludi e trigu.