In su lìburu ‘Miele Amaro‘ de S. Cambosu si fueddat de sa cresia de Santu Nigola de Cuirra e si narat ca est s’unica de Sardìnnia fata totu de matoni cotu. Ligendi in SardegnaCultura e in chiesecampestri.it si cumprendit ca est de architettura romanica, ca est a pariga de km foras de Biddeputzi e acanta de sa SS 125 in su pranu de Cuirra, ca in Sardìnnia nd’at un àtera sceti – in Bono – fata de matoni cotu. Duas sceti e is àtras funt de perda, po su prus, ma comenti si podit biri in sa gallery de SardegnaAbbandonata, sa cresia de Santu Nigola de Massama est fata gei totu de matoni cotu, francu is ispìgulus, is cantonadas, chi funt de arenària comenti is perdas de is intradas, s’àteru est totu de matoni cotu, ma custa est una cresia disconnota e me in is studius acadèmicus non si nd’agatat arrastu, nemus ndi scit e nemus ndi fueddat.
Sa cresiedda de Massama comenti sa de Cuirra est titulat a Santu Nigola V. innui V. est po ‘Vescovo’ e non po ‘Vecchio’ comenti dda tenint arregistrada in su comunu de Aristanis.
Custas cresias benint arremonadas a bortas comenti cresia de Santu Nigola a bortas comenti cresia de Santu Nicolau, is nominis Nigola e Nicolau funt diferentis, ma podeus nai ca funt formas diferentis chi ndi arribant a su Sardu de lìnguas diferentis, Nigola de s’Italianu e Nicolau de su Cadelanu o fortzis in deretura de su latinu. Cadebai wikipedia po ligi is variantis de Nigola.