Sonaddu cussu clacson

clacson - horn - corruNosu in sardu naraus clacson, comenti po totu is àteras cosas chi funt intradas in Sardinna de foras custa cosa puru dda eus arricia cun su fueddu italianu. Su strubu de agatai unu fueddu sardu non si ddu eus mai pigau po nudda e duncas: ascensori, lavatrici, volanti e clacson. Eis a nai ca non ndi teneus de fueddus chi andint beni po dònnia cosa o assumancu aici si creeus, ma si boleus, deu creu, agataus unu fueddu sardu po totu. Mi provu a ddu fai po su clacson. Innantis de totu tocat a nai craru e cun pagu fueddus ita est unu clacson.
Su clacson est unu trastu chi bogat sonu imperau po averti is àterus ca unu est acostendi o ca est acanta.
Pustis tocat a fai su giogu ‘est a tipu…’
Est a tipu de…corru! est a tipu corru, sonat, serbit po averti is àterus, est a tipu corru.
Duncas ddu podeus tzerriai corru chi est unu fueddu sardu e andat beni meda e ddi podeus aciungi unu sentidu nou.
Eis a nai, ma pròpriu corru ddi bolis ponni? est unu fueddu legiteddu, clacson fut prus bellu meda!
Corru est sardu, clacson non est sardu, po arribai a corru apu fatu unu arrexonamentu e sciu cali est, clacson de innui ndi benit?
Clacson benit de unu fueddu ingresu: Klaxon chi fut su nomini ‘trademark’ de unu de is primus clacson, ma cun su sentidu de clacson nci intrat pagu e is ingresus difatis po nai clacson nant ‘horn‘ chi bolit nai: corru!
Ma càstia tui is ingresus e is americanus meris de su mundu nant corru, in sa lingua insoru, e nosu non podeus nai corru in sa lìngua nostra ca si praxit de prus clacson chi est unu fueddu chi non bolit nai nudda. Deu de oi naru corru. Bosàterus fadeis comenti boleis.
Babu sonat su corru.
Daddy plays the Horn.

Custu articulu est scritu cun sa grafia LSC ammoddiada!
Provau in su CROS, versione: Curretore àteras variedades limba sarda.