Nc’est calincunu, in Sardìnnia prus de unu, chi pentzat ca su sardu non serbat a nudda, funt cuddus chi deu naru is sòtzius de sa ”Associazione Sardo inutile” chi traballant chena de pàsiu contras a su sardu, contras a s’idea ca su sardu siat una lìngua comenti a is àteras. Funt medas e stichius in dònnia logu e candu sa chistioni de su sardu bessit a campu nd’est sèmpiri assumancu unu prontu a bogai arreghèscias.
Si faint connosci ca nant totus is pròprias cantzoneddas: ”quale sardo”, ”in sardo non puoi dire questo o quest’altro”, ”ci sono altre emergenze”, ”la lingua che unisce i sardi è l’italiano”. Nant ‘limba’ e non ‘sardu’, nant ‘l’italiano, l’inglese, il francese, la limba, a nai ‘il sardo’ no ddis praxit e custu ca circant sèmpiri de smenguai su sardu a cosa de folklori, ti nant ca in su mundu po si fai a cumprendi tocat a connosci s’ingresu (e bai! Diaderus?), e ca su sardu andat beni aici comenti est, ca gei ddu fueddat sa genti me in is biddas, po allegai de cositeddas de pagu contu, ca po cussu andat beni, ma po allegai de cosa moderna, de scièntzia e de tènnica no fait, non fait a ddu fai in sardu.
Est craru ca donniunu dda podit pentzai comenti bolit e chi a unu no ddi praxat su sardu ddu potzu acetai, su chi non m’andat est ca no ddu nant in craru, non cumprendu ita ddu est asuta o fortzis custa genti tenit sceti ‘trobeas mentales’ comenti narat Nanni Falconi. Chi in sardu si potzat allegai de totu ddu spinnicat a fini a fini, po chi no ddui creit, Giagu Ledda in d-unu bellu post in Limba Sarda 2.0.
Deu creu ca iat a fai a scriri in sardu de totu, bastat a si ponni, e duncas mi seu postu e apu provau a furriai in sardu un’artículu de polìtica e economia chi apu lìgiu in sardegnaeliberta.it, est in is cumentus, non sciu comenti siat bessiu, naraimiddu bosàterus, apu lassau sceti unu fueddu in italianu ‘dividendi’ e is nominis uficialis che ‘Banco di Sardegna’.
Dedicau a is amigas e amigus de sa ”Associazione Sardo inutile”.