Mancai no mi praxiant is fueddus chi impreat e mi ndi stèsiu de is insultus chi fait bollu inditai custu post de Bolognesi ca ndi torrat beni s’arrannegu chi pigat ai sardus intendendi unu continentali chistionendi de sardìnnia chena de ndi sciri nudda e fueddendi sceti pro domo sua.
Calincunu pentzat ca sa Sardìnnia e i sardus siant de spremi comenti e limonis. Non parit beru ma medas italianus tenint de sa Sardìnnia una ìdea folkloristica, si spantant candu bint unu sardu chi fait s’inginneri o su meigu, si creint ca nosu seus innoi totu s’annu abetendi ca issus ndi lompant po si fàiri is fèrias. Fortzis iat a essi mellus chi de imoi a innantis sa regioni candu fait promotzioni nci mandit impari cun is chi funt bestius cun su costumu sardu calincunu sardu chi fait su professori de universidadi, su programadori de computer, su scridori, su tènnicu eletrònicu, su giugi e mancai calincunu chi fait su pastori e su massaju puru po chi totus cumprendant ca custus ùrtimus puru funt diferentis de su stereotipu chi tenti in conca is continentalis. Est berus comenti narat Albert Einstein ca benit mellus a segai unu àtomu chi no a ndi segai unu pregiuditziu, ma tocat a ddu fàiri e agoa spereus ca si ndi seghit puru s’ìdea ca sa Sardìnnia est sceti de spremi.