Su ditzionàriu de Antoninu Rubattu, su DULS, no est prus online, totu is liòngius de is pàginas chi ddu puntant immoi ndi torrant sceda de errori. Non potzu cumprendi poita dd’apant 
bogau de su web, ita dannu fadiat? Est berus ca si podit comporai in paperi e costat pagu puru, sceti 365 eurus, chi seis arricus dd’agatais innoi, e non tenit mancu unu CD po sa circa lestra, paperi sceti.
Circhendi circhendi apu agatau in ‘sardegnacultura.it’ sceti su ditzionariu Italiano – Sardo, su liòngiu dd’apu postu in sa pàgina ‘Lìngua Sarda’. Su ditzionariu Sardu – Italianu non s’agatat. Oh ‘Regione Sardegna’… po praxeri fadei calincuna cosa, ponei dinai, pigaindi is deretus e poneiddu online bosàterus, po prexeri si serbit meda meda.
De genti fueddendi in Sardu si ndi intendit sèmpiri prus pagu, e su sardu chi s’intendit est imburdau de s’italianu siat in is fueddus, siat in sa manera de nai. Si intendit:
…no est su casu tuu…
…apu biu, cioè ia biu…
…aberreus cun sa nova… (in s’arradiu)
…in primu pianu…
…fiu bessendindi quindi m’apu pigau….
e aici nendi, mi firmu po piedadi. Potzu cumprendi chi a unu dd’ammanchit unu fueddu e non sciendi comenti ndi bessiri nci cravit unu fueddu in italianu, su chi non cumprendu e su nai in sardu fendi una furriadura paris paris de s’italianu o s’impreai fueddus italianus comenti ‘cioè’ (bòliu nai / est a nai) o ‘quindi’ (duncas) candu in sardu teneus fueddus po nai sa pròpriu cosa.
Un’amigu m’at nau ca su sardu ‘ha un lessico povero, il Papa è stato eletto e tu non puoi dire neanche fumata bianca’. Amigu caru in sardu si narat ‘fumu biancu’ aici e totu comenti in ingresu si narat ‘white smoke‘, fortzis scriendi in sardu sbàlliu deu puru, chi est, fadeimiddu sciri po caridadi.
Ligendi vitobiolchini.it apu aciapau unu bellu fueddu sardu sintzillu in d-unu post de Stevini Cherchi: stamentu.
Su DULS narat ca stamentu est ‘ramo dell’antico parlamento sardo’, duncas po nai ‘parlamento’ eus a podi nai ‘stamentus’, po nai ‘senato’ primu stamentu e po nai ‘camera dei deputati’ segundu stamentu.
Cantu funt is fueddus sardus chi seus perdendi? o sigheus a pentzai, a sa moda de cuddu, ca teneus ‘un lessico povero’, ma po caridadi.
Po da serrai una nova de Ucrània, in su stamentu de Ucrània si funt brigaus a pari, cun buciconis e tzugadas, ca non fiant de acòrdiu asusu de cali fiat sa lìngua de imperai. Nosu seus prus abistus, in Sardìnnia seus totus de acòrdiu, sa lìngua de imperai est s’italianu.