In vitobiolchini.it si torrat a fueddai de edilizia in Casteddu: ”Su Stangioni: case per tutti o il solito cemento? Il centrosinistra cagliaritano alla prova del fuoco” e ndi fueddat puru su ”gruppodiinterventogiuridico”.
Ddu naru craru a imi custa de Su Stangioni mi parit comenti su contu de cuddu chi teniat una domu bècia cun d-una cortilledda pitica e intamis de s’assentai sa domu, o de dda ghetai a terra e dda torrai a fai noa, dda iat lassada comenti fut e si fiat fatu tres aposentu nous in cortilla e si fut postu a bivi ingunis acanta de sa domu bècia e chena de cortilla.
Su progetu de fai unu bixinau nou po 3000 bividoris e de ddu fai cun tènnicas modernas parit bellu meda, ma su de sighiri a amanniai is citadis e is biddas est unu sbàlliu mannu chi andat contras a is interessus nostrus e dei fillus nostrus.
Ita abbisòngiu teneus de costruiri a nou a foras de sa citadi e de is biddas candu teneus unu muntoni de domus buidas? Cantu costat a fai e a tenni funtzionendi arrugas, impiantus de fogna e de luxi, arretiru de aliga, limpiadura e aici nendi po àterus chilòmitrus e chilòmitrus.
Poita iaus a depi costruiri domus noas e no assentai o torrai a fai is bècias, poita non torraus a fai a nou is bixinaus de sa citadi, poita no ddus torraus a fai, fendiddus comenti narat s’articolu: “un quartiere modello sotto il profilo dell’ecosostenibilità e della viabilità”.
Is domus buidas costant meda, nant is chi bolint su progetu de Su Stangioni, est berus, ma est ingunis chi sa polìtica depit traballai, depit agatai sa manera de dda sa fai intrai in su mercau, iscontendi is tassas a chi ddas donat in afitu, atziendi is tassas po dònnia annu chi una domu abarrat buida, agiudendi a is meris a fai traballus po assentai o torrai a fai is domus cun tènnicas modernas (chena ddas amanniai).
In Casteddu ddu est de traballai po annus e annus po dda mudai in citadi moderna cun domus modernas, prus pagu traficu, metropolitana, bellus palàtzius nous e stòricus, turistas passillendi, pipius gioghendi.
Duncas Sìndigu Zedda, mi permittu de pregontai: boleis abarrai in sa stòria po ndi ai acabau de spaciai sa terra de su comunu de Casteddu o po ai cumentzau a ammodernai sa citadi?