Novas de oi: dinai pagu e fàmini meda, frius e acua a arrori, tres diis e intrat s’ierru.
De cincuanta annus seus fendi sèmpiri is pròprius erroris, non si ndi acataus de s’arrichesa chi teneus e abetaus chi arribit de foras calincunu a si sarvai, calincunu cun dinai meda.
Is sardus sighint a si nci andai, aciungendi disterraus nous a is bècius e is disterraus de oi non si nci andant cun sa balìgia de cartoni, ma cun sa conca prena prena, funt genti studiada, genti scìpia, chi si nci andat ca in Sardinna no agatat traballu, ca innoi non tenit prus ispetu, e funt medas e non pagus, andant a fai beni a un’àteru logu, innoi no serbint, foras! ndi ddus bogaus de mesu de peis chena de cumprendi ca funt una de is arrichesa prus mannas chi teneus.
Nosu intamis de ddis si fai logu po traballai, de provai a cumprendi comenti iant a podi essi de agiudu a su logu nostru, seus sèmpiri circhendi genti chi tèngiat dinai de investi, ca po nosu su svilupu est a strantaxai domus acanta de mari po arricus e albergus cun spa e beauty farm, aici si pentzaus ca ant a benni turistas cun buciacas unfradas de dinai. Seus cincuanta annus circhendi genti aici, fatu fatu ndi agataus unu, ddi donaus un’arrogu (mannu!) de sa terra prus bella chi teneus e issus si ndi cuntentant e nosu sigheus a cascai fàmini.
Svilupu, svilupu, svilupu, e sigheus a nai custu fueddu, maladitu de fueddu, mancu cumprendeus ita bolit nai, ita est su svilupu? Est a sighiri a fai domus e domus e albergus. Est a nci bogai sa genti prus scìpia e abbista chi teneus? Custu est su svilupu chi prenit sa buca de totus, su svilupu de s’economia, su svilupu chi non bolit nai nudda, de innui ndi est bessida custa callonada de su svilupu non ddu potzu cumprendi.
Iaus a tenni de fai cosa meda chi non fadeus in s’agricortura, in su bestiàmini, in su turismu, in sa produtzioni de energia, in sa scola, in s’edilitzia puru, ma is mellus cerbeddus chi teneus ddus mandaus a traballai po àterus stadus. Mischinus de nosu circhendi de si svilupai, eus a imparai cras.